«بسبب قيام مقهى بتخزين الشيشة داخل كابينة كهرباء».. استغاثة من سكان عمارات الحي الثالث بجهاز القاهرة الجديدة والجهات المعنية (صور)

اعرب سكان عمارات الحي الثالث، عن إستيائهم جراء قيام احد أصحاب المقاهي، بتخزين الشيشة وادوات المقهى داخل إحدى كبائن الكهرباء المغذية للمنطقة، وهو ما اعتبروه كارثة تهدد حياتهم.

وطالب سكان المنطقة بتدخل عاجل من جهاز مدينة القاهرة الجديدة، ووزارة الداخلية وشركة الكهرباء، وغلق المقهى ورفع أدواته التي يقوم بتخزينها داخل إحدى الكبائن التابعة لشركة الكهرباء، والمغذية للمنطقة، في اسرع وقت قبل حدوث كارثه.

حيث تداول سكان عمارات التجمع الثالث، منشور لأحد السكان، يروي خلاله تفاصيل الكارثة التي يقوم بها المقهى دون ندخل من احد.

وجاء المنشور كالتالي:

انقطاع الكهرباء بجزء كبير من عمارات الحي الثالث ، لحد هنا وخبر عادي مفيش فيه مشكلة ، وتنزل ادارة الكهرباء او الجهاز اياً كان المختص تصلح العطل وخلاص.

وتابع لكن عند النزول لأصلاح المشكلة نفاجئ بأيه، غرزة من اشهر الغرز في الحي الثالث (اسمها ابو دنيا) فاتح كابينة المحول بتاعت الكهرباء وعاملها مخزن للشيشة .

واضاف شوفتوا الاستهتار وصل بالناس دي لحد فين ، ده ابسط عطل في الكهرباء ممكن يتسبب للسكان بخسائر في اجهزة كهربائية بالالوف وكلنا اكيد جربنا.

واستكمل قائلاً:"الناس دي بغباءهم وطمعهم ممكن يولعو في الحي كله عشان يكسبوا جنيه".

واستطرد الموضوع مبقاش مخالفة عادية ونناشد الجهاز علشان ينزل يزيلها ... دي مسألة حياة او موت حرفيا مسألة امن عام ... السكان بيتهددوا طول الوقت وهما قاعدين في بيوتهم بمصايب بخسائر مادية متمثلة في اجهزة كهربائية او خسائر معنوية في الرعب اللي هيحصل لو كابينة كهرباء ولعت وده مش بعيد وحصل قبل كده.

واوضح ده غير خسائر المال العام (اللي محدش بيسأل فيه) متمثلة في خراب كبائن الكهربا واللي هيعاد تغييرها من اموالنا وضرائبنا.

واستكمل كلامه بأستغاثة عاجلة لـ(جهاز المدينة / وزارة الداخلية / شركة الكهرباء ) ولكل مختص ولكل واحد لسه بيخاف على مصلحة السكان والاسر بغلق الكوارث (المخالفات سابقا) في الحي الثالث .

واختتم حديثه قائلاً:"للتذكير مرة اخيرة الغرز هي(ام كلثوم / ابو دنيا/ المركز الطبي) ومعروفة لاي حد في التجمع وبيتردد على الحي، لكل ساكن محترم متضرر من المخالفات يشارك معانا".